Kleñved revdredizhus (gwenerel) diwar ar gonokok (Neisseria gonorrhoea), oc'h erzerc'hañ gant ar gwaz dre danijenn ar c'han troazh (kantroazhfo gonokokel), gant ar vaouez dre danijenn ar c'hourzh, ar gouin pe ar grozh (kourzhfo, gouinfo, krozhfo gonokokel) ; tanijennoù heñvel treuzkaset ivez da geñver an darempredoù revel zo dezho da wezherioù kleñvedus Trichomonas, Candida, Chlamydia.
Kleñved diwar strafuilh kennevid ar bazennoù purek o tevoudañ usvec'h an drenkenn urek er bevedeg, erzerc'h dre varroù foel lemm ha laurus en arzoù, er c'henvell kreiztroad-oeñsoù kentañ pergen ha dre goc'hionadoù urat lec'hiet er furmadurioù tro-genvell, el lounezh, e pleg ar skouarn ; goude bloavezhioù ez ervez d'an urloù henekaat, gant koc'hionadoù trenkenn urek pe urat dindan ar c'hroc'hen (tofuz où), e-barzh ar c'henvelloù (arzadoù urlaouel), ar stirennoù hag er flugez : an nerveg (nervostoù), al lounezh (grouanegezh urek, lounezhfo entremezel), ar reizhiad kalongwazhiedel (kurunerfo) ; ekichen an urloù kentael, genezhel, hêrezhel, e teskriver urleier eilvedel dianlen da wadnaouedoù, d'ar skorted lounezh, da gemeradur liaoù 'zo ; azoniek e van prederiadurioù an urloù kentael : ouzh ar barroù lemm ez eo efedus ar c'holkikin, evel mezegadur hirbad e tiounezer heuderioù enaozerezh an drenkenn urek (allopurinol).