Preder
métiers de l'informatique ◊ computer personnel ◊ micherioù ls. (b.) stlennegel ― Geriadur ar stlenneg

Kement rumm arbennigourion 'zo o labourat e skourroù diseurt ar stlenneg : ar c'hoskor atebek war ar meziant (ijinourion ha dezrannourion, gouleverion ha dezrannourion c'houlever), ar c'hoskor korvoiñ (oberataerion, penelourion), koskor an euvriñ roadennoù, koskor an trezalc'h.

Gant emdroadur diastal ar reizhiadoù stlennegel hag astennadur herrek tachenn o dedalvezadoù e tiwan ingal perzhegezhioù nevez. Menegomp da skouer an ardead roadennoù, an ardead rouedad, ar robotegour, an naouegour, h.a.

E 1980, e Frañs, diwar c'houlenn an Tevezeg, e savas Jacques Tébéka un danvez rizhouriezh eus ar micherioù stlennegel, hervez tri domani obererezh :

~ ar stlennegezh diazez (aozennoù, periantoù, meziantoù diazez, rouedadoù) ;

~ ar stlennegezh skignañ (prestiantoù skoueriek ha gennadel, gwazadoù amledet war rouedadoù) ;

~ ar stlennegezh dedalvout (enarc'hwelañ ar c'hreizennoù keweriañ, degerzañ al loazioù stlennegel d'an arveriaded vihan hag etre).

O ledanaat ar stern, e teuer da heñvelekaat ar stlennegezh ouzh ar micherioù all, hag e komzer da skouer eus mestr oberour er stlennegezh.

santé : professions de ∼ ◊ ◊ micherioù l. (b.) yec'hedel ― Geriadur ar vezekniezh

Hervez Dezveg foran ar Yec'hed ez eo rannet ar micherioù yec'hedel e tri rumm :

  • Ar micherioù mezegel : mezeion, dentourion hag amiegeion (mell. L4111-1 da L4163-10).

  • Micherioù al liaerezh, ar fizik mezegel : liaerion, darbariaded liaerezh, darbariaded liaerezh ospitalel, fizikourion vezegel (mell. 4211-1 da 4252-3).

  • Micherioù an eilerion vezegel (klañvdiourion, leuñvourion, troadourion, bregurourion ha bredloc'hadourion, mouezh- ha selleeunerion, embregataerion tredanskinouriezh vezegel ha kalvezourion arnodvaoù mezegel, klevosodourion, optikourion-lunedourion, dentosodourion hag amsteudellerion, bouedourion), adklañvdiourion, eilerion vabsavouriezh hag ambulañsourion (mell. 4311-1 da 4394-3).

Gant micherioù 'zo ez eus un dezvad reolennet dre un deved embreger o tespizañ ur roll gwezhioù mezegel aotreet d'ar vichereion angorzhet. A du 'rall, seizh micher zo dindan reolerezh pep a urzh (mezeion, liaerion, amieion, dentourion, klañvdiourion, leuñvourion, troadourion). An urzhioù-se zo aozadurioù korfuniadel dezho ur roll derc'houezañ ar vicher, hag ivez ur gefridi a wazerezh foran dre berzhiañ e reolennadur ar pleustr ha dre sammañ roll ur varnadurezh kenurzhel evit an izili, a zo ret dezho bezañ evit gallout embreger o micher.